මුළු ගමම එකතු වෙයි – දැරිය ඩැහැගැනීමට පැමිණි උකුස්සා අල්ලයි

නිවස ඉදිරිපිට මිදුලේ සෙල්ලම් කරමින් සිටි සත් හැවිරිදි තම දියණිය ඩැහැගැනීමට උත්සාහ කළ උකුස්සෙකුට ඉදලෙන් පහරදී දියණිය බේරාගැනීමට අනුරාධපුර මවක් සමත්වී තිබේ.

සිළු බඹර උකුස්සා නමින් හඳුන්වන මෙම උකුස්සා ගම්වාසින් විසින් උගුලක් යොදා අද අල්ලාගෙන අනුරාධපුර වනජීවි කාර්යාලය වෙත ආරක්ෂිතව බාරදෙනු ලැබීය.

ප්‍රහාරයට ලක්වූ හත් හැවිරදි දෙව්මිනි අමායා දැරිය අද (14දා) උදෑසන නිවස ඉදිරිපිට සෙල්ලම් කරමින් සිටියදී ඉහළ අහසේ සිට පියාඹා පැමිණි උකුස්සාගේ ප්‍රහාරය එල්ලවී ඇති අතර දැරියගේ පිටට වැදුණු තියුණු නිය ප්‍රහාරයෙන් ඇය තුවාල ලබා ප්‍රතිකාර සඳහා අනුරාධපුර ශික්ෂණ රෝහලට ඇතුළත් කිරීමෙන් අනතුරුව බාහිර වෛද්‍ය ප්‍රතිකාර ලබාදී රෝහලෙන් පිටත්කර තිබුණි.

ඉහළ අහසේ සිට වේගයෙන් පැමිණෙන උකුස්සා අවස්ථා හතරකදී කුඩා දරුවන් සිවු දෙනෙකු පසුපස එළවා ඔවුන් ඩැහැගැනීමට උත්සාහ කර ඇතත් දරුවන් නිවෙස් තුළට වැදි උකුසු ප්‍රහාරයෙන් බේරී තිබේ.

අද උදෑසන කුඩා දැරිය ඩැහැගැනීමට උත්සාහ කළ උකුස්සාට එම ඉලක්කය වැරදි යාමත් සමග සුචරිතගම ගම්වැසියන් පිරිසක් මෙම පක්ෂියා ආරක්ෂිතව අල්ලා ගැනීමට මෙහෙයුමක් දියත්කර තිබුණි.

ඒ අනුව ගම්වාසි තරුණයන් පිරිසක් උකුස්සා ගැවසුනු ස්ථාන කිහිපයක් නිරික්ෂනය කර අමු මස් කැබලි කිහිපයක් දමා උගුලක් අටවා උකුස්සාව ඊට කොටුකර ඒ සම්බන්ධයෙන් අනුරාධපුර වනජීවි කාර්යාලයේ නිලධාරීන්ට දැනුම්දී තිබුණි.

එහි පැමිණි වනජීවි නිලධාරීන් මෙම උකුස්සා සිළු බඹර උකුස්සෙකු බව පැවැසීය.

මේ දිනවල පවතින වියළි කාලගුණය සමග ආහාර සොයා ජනාකීර්ණ ප්‍රදේශවලට මෙම පක්ෂියා පියාසර කර තිබෙන බවත්, පක්ෂියා අභය භූමියකට මුදාහරින බවත් වනජීවි නිලධාරියෙක් පැවසීය.

සිය දියණිය උකුස්සාගෙන් බේරාගත් මව අත් දැකිම පිළිබඳව මෙසේ පැවසුවාය. “මම උදෑසන මිදුල අතු ගගා හිටියේ. දුව මිදුලේ සෙල්ලම් කරමින් සිටියේ. එක්වරම විදුලි වේගයෙන් උකුස්සා දරුවා සිටි ස්ථානයට ඇවිල්ලා අත්තටු විදාහලා එයාව වහගෙන හොටය පුබ්බාගෙන හිසට කොටන්න සූදානම් වුණා.

මම මිදුල අතුගගා හිටපු ඉදලෙන් කෑගගහ උකුස්සට ගැහුවා. දරුවව වහගෙන හිටපු උකුස්සා එයාව අත ඇරලා පියඹලා ගියා.උකුස්සගේ නිය පාරට දුවගේ පිට කැපිලා වගේ තිබ්බා. අපි දරුවව අනුරාධපුර රෝහලට ගෙනිච්චා නමුත් වෛද්‍යවරු කිවුවා බය වෙන්න දෙයක් නෑ. බෙහෙත් විදින්නත් අවශ්‍ය නෑ කියලා.”

අනුරාධපුර බී.ජී. චතුරංග

කුලියාපිටියේ වෝක්ස්වැගන් කර්මාන්ත ශාලාවට වෙච්ච දේ ……………

2015 මහ මැතිවරණ සමයේදී ලංකාවේ කුලියාපිටිය ප්‍රදේශයට වොක්ස්වැගන් කර්මාන්ත ශාලාවක් ගෙන එන බවට දේශපාලකයන් ගැසූ කයිවාරු ඔබට මතක ඇති.

අවසානයේ වොක්ග්වැගන් කම්හල ගියේ ලංකාවේ කුලියාපිටියට නොවේ. රුවන්ඩාවේ කිගාලි අගනුවරට ය.

රුවන්ඩාව ලෝකයේ දුප්පත්ම රටවල් 50 න් එකකි. එසේම ත්‍රීරෝද රථ ගණනටම මෝටර් රථ තිබෙන ලංකාව මෙන් නොව, රුවන්ඩාවේ මෝටර් රථ හිමිකරුවන් ගණන ද ඉතා අල්ප ය. නමුත් පසුගිය ජූනි මාසයේ රුවන්ඩාවේ ආරම්භ කළ ප්‍රථම වොක්ස්වැගන් කම්හල මේ වන විට ඉතා හොඳින් ක්‍රියාත්මක වෙමින් තිබේ.

යුරෝපයේ විශාලතම මෝටර් රථ නිෂ්පාදකයා වන වොක්ස්වැගන්, සිය අලුත්ම කම්හල පිහිටුවීම සඳහා කිසිදු පැකිළීමකින් තොරව තෝරාගත්තේ රුවන්ඩාවේ කිගාලි අගනුවරයි.

මෙම ජර්මානු මෝටර් රථ සමාගමේ අලුත්ම රුවන්ඩා එකලස් කිරීම වන්නේ Polo ය. පළමු අදියරේදී එම වර්ගයේ කාර් 5000 ක් එකලස් කිරීමට යෝජිත ය. ඒ හැරුණු විට Passat, Tiguan, Amarok සහTeramont වර්ගයේ මෝටර් රථ ද එහිදී නිපදවෙනු ඇති.

ඒ සඳහා අමුද්‍රව්‍ය වශයෙන් යොදාගන්නේ කෙන්යාව හරහා දකුණු අප්‍රිකාවේ සිට රුවන්ඩාව වෙත නැව්ගත කරනු ලබන මෝටර් රථ කොටස් හා අමුද්‍රව්‍යයන් ය. එය ඇමරිකානු ඩොලර් මිලියන 20 ක ආයෝජනයකි. රැකියා 1000 ක් මේ පළමු අදියරේදී උත්පාදනය වේ.

රුවන්ඩාව ජීවත් කරවීමට නම් වසරකට ඇමරිකානු ඩොලර් බිලියනයක විදේශ ආධාර අවශ්‍ය ය. රුවන්ඩාවේ ජනගහනය මිලියන 12 කි. ඒ අතරින් මෝටර් රථයක් හිමි අය සිටිනුයේ මුළු රටටම ලක්ෂ 2 ක් පමණකි. මෙම මෝටර් රථවලින් ද වැඩි කොටස සෙකන්ඩ් හෑන්ඩ් ජපන් කාර් ය. නමුත් ඒ තත්වය ඉදිරියේදී වෙනස් වනු ඇත.

2015 මහ මැතිවරණ සමයේදී ලංකාවේ කුලියාපිටිය ප්‍රදේශයට වොක්ස්වැගන් කර්මාන්ත ශාලාවක් ගෙන එන බවට දේශපාලකයන් ගැසූ කයිවාරු ඔබට මතක ඇති. නමුත් එය අවසානයේ ගියේ කුලියාපිටියට නොව කිගාලියට ය. රුවන්ඩාව සැබවින්ම අපට වඩා ගව් ගණනක් ඉදිරියෙනි. අද වන විට රුවන්ඩාව අප්‍රිකාවේ ඩිජිටල් විප්ලවයේ පෙර ගමන්කරුවෙකි. පොදු බස් රථ, රෝහල්, ටැක්සි රථගාල්වල පවා ෆ්‍රී වයිෆයි තිබේ. කොරියා ටෙලිකොම් සමාගමේ හවුල්කාරිත්වය යටතේ ජනගහනයෙන් 95%කට 4G පහසුකම් ලබාදීමට සැලසුම් කර තිබේ. ඔබට රුවන්ඩාවේ දී දින 2 කින් සියලු නීතිමය අවශ්‍යතා සම්පූර්ණ කර, ව්‍යාපාරයක් ආරම්භ කළ හැක. ෆිච් ශ්‍රේණිගත කිරීම්වලට අනුව රුවන්ඩාව සීඝ්‍ර ආර්ථික වර්ධනයක් ලබමින් සිටින රටකි. රුවන්ඩාවේ ජනගහනයෙන් 90%කට වඩා සෞඛ්‍ය රක්ෂණ තිබේ. රුවන්ඩාවේ මිලියන 12 ක ජනගහනයෙන් මිලියන 1ක්ම 2006-2011 අතර කාලයේදී දුප්පත්කම පිටුදැක ඇත. ඒ සඳහා ගෘහ කේන්ද්‍රීය සංවර්ධන විසඳුම් ඔවුන් විසින් හඳුන්වා දෙනු ලැබිණි. Girinka වැඩසටහන එයින් එකකි. මේ යටතේ රටේ සෑම දුප්පත් පවුලකටම එළදෙනක් ලබාදුන්නේ කෘෂිකාර්මික කටයුතුවල පහසුව සඳහා පමණක් නොව ඔවුන්ගේ මන්දපෝෂණ අවදානම ද දුරලීම සඳහා ය. කුඩා ව්‍යාපාර අවස්ථා ද ඒ අනුව ජනනය විණි. 2007 වසරේදී රුවන්ඩාව ප්ලාස්ටික් බෑග් භාවිතය සම්පූර්ණයෙන්ම තහනම් කළ පළමු රට බවට පත්විය. ලෝකයේ ස්ත්‍රී පුරුෂ සමාජභාවී වෙනස්කම් අවම රටවල් අතරින් රුවන්ඩාව පුරා වර්ෂ ගණනක් තිස්සේ පසුවන්නේ මුල් දස දෙනා අතර ය.

සෑම මාසයකම අවසන් සෙනසුරාදා රුවන්ඩා වැසියෝ සිය ජනාධිපතිවරයා ද සමග ‘උමුගන්ඩා‘ දිනය සමරති. එය වනාහී ජාතික ප්‍රජා සේවා දිනයයි. රුවන්ඩා වැසියන් එදිනට ස්වෙච්ඡාවෙන් රජයේ ගොඩනැගිලිවල ඉදිකිරීමේ කටයුතුවලට සහාය දෙති. කෘෂිකර්මයට රුකුල් දෙන තෙත් බිම් ශුද්ධ පවිත්‍ර කර ගනිති. සිය නගර සහ ගම් පිරිසිදු කර ගනිති. මේ වන විට කිගාලි අගනුවර සැලකෙන්නේ ලෝකයේ පිරිසිදුම නගරයක් ලෙස ය.

මේ බොහෝ ජයග්‍රහණවල පෙර ගමන්කරුවා ජනපති පෝල් කගාමේ (Paul Kagame) ය. ‘‘වොක්ස්වැගන් කම්හල රුවන්ඩාව ආර්ථික ප්‍රතිසංස්කරණ වෙත යන ගමනේ අලුත් පරිච්ඡේදයක්‘ බව ඔහු කීවේය.

පෝල් කගාමි භාරගත්තේ 90 දශකයේදී ටුට්සි – හුටූ සංහාරවලින් ලක්ෂ 8 ක් පිරිමින් කැති ගෑ දේශයකි. මේ රටේ පිරිමින් හිඟ ය. රටේ ශ්‍රම බලකායෙන් 86% ක් කාන්තාවන් ය. අද දිනය වන විට රුවන්ඩාව හැඳින්වෙන්නේ ‘අප්‍රිකාවේ සිංගප්පූරුව‘ යනුවෙනි. එදා සිංගප්පූරුවේ ලී ක්වාන් යූ, සුද්දා දමා ගිය ලංකාව පෙන්නා, ‘මේ තිබෙන්නේ ආසියාවේ මීළඟ ආශ්චර්යය‘ යැයි කීවේය. පසුකලෙක මේ යෙදුම ලංකා දේශපාලනයේ ප්‍රහසනයක් බවට පත්වෙද්දී රුවන්ඩාව දැන් අප්‍රිකාවේ මීළඟ ආශ්චර්යය බවට පත් වෙමින් තිබේ.

රදිකා ගුණරත්න

බුකියේ අපේ කට්ටිය එංගලන්තය පරදා ලංකාව දිනවයි

මේ දවස්වල ක්‍රිකට් ලෝකයේ වැඩිම අවධානයක් දිනා ගත්ත රටවල් 2 ක් ඉන්නවා.

ඒ ශ්‍රී ලංකාව සහ එංගලන්තය. දකුණු අප්‍රිකාව සමඟ අවසන් එක්දින තරඟ 2 ම විශිෂ්ඨ ලෙස ජය ගන්න ශ්‍රී ලංකාව සමත් වුණා.

ඒ වගේම ඉන්දියාව සමඟ තිබ්බ එක්දින තරඟයේදී එංගලන්තය ඉන්දියාවට පාඩමක් කියලා දුන්නා.

මේ නිසා ICC ය මේ රටවල් 2 ට තෑග්ගක් දෙන්න සූදානම් වුණා. ඒ ICC Facebook පිටුවේ Cover Photo එකට ජයග්‍රාහී කණ්ඩායමේ ඡායාරුපයක් දාන්න.

හැබැයි රටවල් 2 න් එකකට විතරයි මේ තෑග්ග ලබා ගන්න පුළුවන්. ඒ තෑග්ග ලබා දීමේ අවස්ථාව ලැබිල  තිබුණේ ක්‍රිකට් ප්‍රේක්ෂකයන්ට.

ඒ අනුව ICC ය Facebook එකේ ඡන්දයක්  තිබ්බා. ඒ ඡන්දයෙන් වැඩිම මනාප ගන්න කණ්ඩායමේ ඡායාරුපය ICC Facebook Cover Photo එක විදියට පළ කරනවා කිව්වා.

ඒ අනුව මීට මොහොතකට  පෙර ICC ය තම Facebook පිටුවෙ මුල් ජායාරූපය ශ්‍රී ලංකා ක්‍රිකට් කණ්ඩායම ලෙස තෝරාගෙන තිබෙනවා. ඔන්න ඔහොමයි එංගලන්තය පරදලා අපේ කට්ටිය ෆේස් බුක් එකෙන් දිනුවේ

මාලගමුවට ජිවිත තර්ජන – පොලිස් පරීක්ෂණ වහා අරඹයි

ප්‍රවීණ මෝටර් රථ ධාවන ක්‍රීඩකයකු වන ඩිලන්ත මාලගමුව මහතා ඝාතනය කිරීමේ සැලැස්මක් පිළිබඳව විශේෂ පොලිස් කණ්ඩායම් කිහිපයක් පරීක්ෂණ අරඹා ඇත.

මේ විමර්ශනය පවත්වන්නේ මාලගමුව මහතා සිද්ධිය පිළිබඳව පොලිස් මූලස්ථානයට කළ පැමිණිල්ලකට අනුවය.

ඉඩම් ප්‍රශ්නයක් මත හිටපු ප්‍රාදේශීය දේශපාලඥයකු දැනට බන්ධනාගාර ගතව සිටින සිරකරුවකුට මාලගමුව මහතා ඝාතනය කිරීමේ කොන්ත්‍රාත්තුව දී ඇති බවත් මෑතකදී අත්අඩංගුවට ගැණුනු පාතාල සාමාජිකයෙකුගෙන් ප්‍රශ්න කිරීමේදී මේ කරුණු හෙළිවී තිබෙන බවත් පොලිස් ආරංචි මාර්ග සඳහන් කරයි.

මේ අනුව පොලිසිය මෙම ඝාතන සැලසුම ගැන මාලගමුව මහතාට දැනුම් දී ඇත.මාලගමුව මහතා සිද්ධිය පිළිබඳව පොලිසියට පැමිණිලි කර ඇත්තේ ඉන් පසුවය.

මේ පිළිබඳව අප කළ විමසුමකදී අදහස් දැක්වු ප්‍රවීණ මෝටර් රථ ධාවන ක්‍රීඩක ඩිලන්ත මාලගමුව මහතා පැවැසුවේ මේ සිද්ධිය පොලිසිය දැනුම් දුන් පසුව තමා ඒ පිළිබඳව පොලිසි මූලස්ථානයට පැමිණිල්ලක් කළ බවයි.

මේ තත්ත්වය මත තමාගේ ජීවිතය අනාරක්ෂිත හෙයින් රජය මේ ගැන අවධානය යොමු කළ යුතුබව ඔහු වැඩිදුරටත් කීය.

ලෝක ශූර රොනාල්ඩෝ අසාධ්‍යව ස්‌පාඤ්ඤයේ රෝහලක

2002 ලෝක පාපන්දු කුසලානය බ්‍රසීලයට දිනාදුන් ලෝක ප්‍රකට පාපන්දු ක්‍රීඩක රොනාල්ඩෝ නිව්මෝනියාව වැළඳී අසාධ්‍ය තත්ත්වයෙන් ස්‌පාඤ්ඤයේ ඉබ්සා නගරයේ රෝහලක දැඩි සත්කාර ඒකකයට ඇතුළත් කර තිබේ.

41 හැවිරිදි රොනාල්ඩෝ බ්‍රසීලය වෙනුවෙන් ජාත්‍යන්තර ගෝල 62 ක්‌ වාර්තා කර තිබේ.

ස්‌පාඤ්ඤයේ ඉබ්සාහි නිවාඩුවක්‌ ගත කරන අතරතුර ඔහු මෙසේ අසනීප වී තිබේ.

2002 ලෝක පාපන්දු ශූරතාවලියේ අවසන් තරගයේදී ජර්මනියට එරෙහිව ජයග්‍රාහී ගෝල දෙකම ලබා ගනිමින් ලෝක කුසලානය බ්‍රසීලයට හිමිකර දුන්නේ රොනාල්ඩෝය.

ඉල්ලුවට පස්සේ එකක් නෙමේ දෙකක් දුන්නා – පූජා අගමැතිගේ හාදුව ගැන කිව්ව විස්තරේ

මෙවර සරසවිය සම්මාන උළෙලේදී 2017 වසරේ හොඳම නිළි සම්මානය දිනා ගත් පූජා උමාශංකර් කතාබහට ලක්වූයේ සම්මානය ලබා ගත් අවස්තාවේ පූජා උමාශංකර් විසින් අගමැති රනිල් වික්‍රමසිංහ සිප ගැනීමත් සමගයි. සතිඅන්ත පුවත්පතක් සමග සංවාදයට එක්වූ පූජා එම සිදුවීම පිළිබදව අදහස් දක්වා තිබුණා.

එම සංවාදය පහතින්,

මෙවර සරසවිය සම්මාන උළෙලේදී 2017 වසරේ හොඳම නිළි සම්මානය ඔබට ලැබුණා. ලංකාවේදී පළමු වතාවට හොඳම නිළි සම්මානය ගනිද්දි සතුටු ඇති ?
අම්මෝ ඇති යාන්තම් හොඳම නිළි සම්මානයක් මට ලැබුණා. හොඳම නිළිය වෙනවා කියලා මම කවදාවත් හිතුවේ නැහැ. ඉතින් හොඳම නිළිය සම්මානයක් ලැබුණාම ඒ සතුටට තාම මම පාවි පාවි ඉන්නවා වගේ දැනෙන්නේ.

ජනප්‍රිය නිළි සම්මානය ලබාගෙන තිබ්බ නිසා ඊළඟ බලාපොරොත්තුව වුණේ හොඳම නිළි සම්මානය නෙමෙයිද?
හොඳම නිළියට මම නොමිනේට් වෙයි කියලාවත් මම හිතුවේ නැහැ. ජනප්‍රිය අංශයේ විතරයිනේ මගේ නම කොහොමත් දාන්නේ. ඒක හොඳයි. මට ඒක ගැටලුවක් නැහැ. මට ආරංචි වුණා මෙවර සම්මාන උළෙලේ ජනප්‍රිය අංශයේ සම්මාන නෑ කියලා. එතකොට මම හිතුවේ මට සම්මානයක් තියෙන එකක් නෑ කියලා.

කොහේ හිටියත් සම්මාන උළෙලවලට පූජා එනවා නේද?
සරසවිය සම්මාන උළෙල ලොකු සම්මාන උළෙලක්නේ. කොච්චර කාලෙකට පස්සෙද ඒක තියෙන්නේ. ඉතින් මට සම්මාන උළෙලට එන්න ආසාවක් තිබුණා. ඒකට මම අනිවාර්යයෙන් එන්න ඕන කියලා හිතුවා. මම බැංගලෝර්වල හිටියේ. පසුගිය 3 වැනිදා උදේම මම ලංකාවට ආවේ සම්මාන උළෙලට යන්න ආසාව තිබුණු නිසා. අත්පුඩි ගහන්න ආපු මම දින්නත් එක්ක.

පූජාට හොඳම නිළිය සම්මානය ලැබුණම අනෙක් අයත් පූජා වගේම ඒ ගැන සතුටු වෙනවා ඇතිද?
ෆේස්බුක් එකෙන් ගොඩක් අය මට සුබපතලා තියෙනවා. ඒ අයට තෑන්ක්ස් කරලා කමෙන්ට් දාලා මට අතත් රිදෙනවා. ප්‍රේක්ෂකයන්ගේ ආදරය නිසානේ මට මේ සම්මාන ලැබෙන්නේ. ඒක දෙවියෝ මට දීපු ආශීර්වාදයක්.

සැමියා පූජාගේ ජයග්‍රහණය ගැන සතුටු වෙනවත් ඇති?
ඔව්. එයා මට නිදහසේ වැඩ කරන්න දෙන කෙනෙක්. එයා මගේ ජයග්‍රහණය ගැනත් ගොඩක් සතුටු වෙනවා. යන යන තැන එන්න එයාට බැහැ. නමුත් එයා මට ලොකු සහායක් දෙනවා.

සම්මාන උළෙලේදී පූජා සම්මානය ගත්ත විදියත් මේ වෙනකොට හැමෝගෙම අවදානයට ලක්වෙලා?
සම්මානය ගත්ත හැටියට හැමෝම මට හිනාවෙනවා. දිනනවා කියලාම සම්මාන උළෙලට ආවා නම් හිතලා ඉන්නවනේ. එක පාර සම්මානයක් ලැබෙද්දි මට ආව සතුටට තමයි මම එහෙම හැසිරුණේ. සරිගම චිත්‍රපටය වෙනුවෙන්නේ මට ඒ සම්මානය ලැබුණේ. ගොඩක් අය කියනවා මම සරිගම චිත්‍රපටයෙදිත් දඟයි වේදිකාවෙදිත් ඒ වගේම දඟයි කියලා. කමක් නෑ ඉතින් මම දඟයි කියලා හිතුවට.

පූජා අගමැතිතුමාගෙන් සම්මානය ගත්ත හැටිත් හැමෝගෙම මතකයේ තිබෙනවා. මොකක්ද ඇත්තටම ඒ වේදිකාවෙදි වුණේ?
මම වේදිකාවට යද්දි මගේ වම් පැත්තෙ රන්ජන් අයියා හිටියා. මම ළඟදි රන්ජන් අයියා, චන්න විජේවර්ධන මාස්ටර්, උදාරි, උපේක්ෂා, ශනුද්‍රි, අමිල, පුබුදු, ස්වර්ණා මල්ලවආරච්චි අක්කි, ජීවන් අයියා එක්ක මෙල්බන් ගියා සිනෙතරු රැයක් කියන වැඩසටහනට. එතැනදි හැමෝම එක්ක මම යාළු වුණා. ඉතින් මම වේදිකාවට යන්න කලින් රන්ජන් අයියාගෙන් කිස් එකක් ගත්තා. වේදිකාවෙදි අගමැතිතුමා කිව්වා ‘ෂා ඇඳුම ලස්සනයි’ කියලා. ‘ඉන්නකෝ, මෙහෙම කරනකොට දිලිසෙනවා බලන්නකෝ කියලා මම ඇඳුම කරකවලා පෙන්නුවා. ඇඳුමේ ස්ටෝන් එතකොට ලස්සනට පේනවා. මම ලස්සනයිද ඇහුවම අගමැතිතුමා කිව්වා ‘ ආ……… ඔව් ලස්සනයි’ කියලා. සම්මානය ගනිද්දි මම එතුමට කිව්වා ඔබගේ අතින් සම්මානය ගන්න ලැබීම ගෞරවයක් කියලා.

එතකොට අගමැතිතුමා මොකද කිව්වේ?
ඔයා එන්න කලින් රන්ජන්ගෙන් කිස් ගත්තනේ. සම්මානය ගන්නවට වඩා ලොකු රන්ජන්ගේ කිස් එකනේ කියලා ඔහු මට හිනාවෙලා කිව්වා. ඊට පස්සේ මම ඔහුගෙන් ඇහුවා ‘සර් මට කිස් එකක් දෙන්න අවසර දෙනවද කියලා. එක කිස් එකක් දුන්නට පස්සේ මට තව එකක් ඕනේ කියලා මම කිව්වා. ඒක තමයි වුණේ.

පූජාට නේද හාදුවක් ඕන වෙලා තිබුණේ?
ඔව්. මට ඕන නිසා තමයි මම ඉල්ලුවේ. මිනිස්සු හිතනවා මෙයා කොහොමද අගමැතිතුමාගෙන් කිස් එකක් ගත්තේ කියලා. ජීවිතයේ මොනවා හරි ඕනේ නම් ඒක කෙනකුගෙන් ඉල්ලන්න ඕන. ඉල්ලුවොත් විතරයිනේ දෙයක් හම්බවෙන්නේ. ඒ වගේ මම අගමැතිතුමාට කිව්වා මට උම්මා එකක් ඕනේ කියලා. ඊට පස්සේ එකක් නෙමෙයි දෙකක්ම දුන්නා.

එහෙම ඉල්ලන්න පූජා දෙපාරක් හිතුවේ නැද්ද?
මට එහෙම හිතන්න වෙලාවක් තිබ්බේ නෑ. එයා කිස් එකක් දුන්නේ නැත්නම් මම එයාට කිස් එකක් දෙනවා. මේක දේශපාලන වේදිකාවක් නෙමෙයිනේ. මේක සතුටෙන් ආදරයෙන් පිරුණු සම්මාන උළෙලක්. එතැනදි දේශපාලන වේදිකාවක වගේ ඉන්න ඕනේ නෑනේ. මට දේශපාලනය එක්ක සම්බන්ධතාවක් නෑනේ. මම සම්මාන උළෙලට ගිහින් අත රිදෙනකල් හැමෝටම අත්පුඩි ගැහුවා. මට විසිල් ගහන්න බැරි නිසා මම විසිල් ගැහුවේ නැහැ. නැත්නම් විසිලුත් ගහනවා. එතැන ඉන්න ඕන සතුටෙන්. මම ඒ සතුටෙන් තමයි වේදිකාවට ගියේ. මට දේශපාලනයද කියලා අදාළ නැහැ.

අගමැතිතුමා පූජාට දුන්න හාදුව ගැන සමාජ මාධ්‍යවලත් හරි හරියට කතා කරන්න අරගෙන ?
මට තාම ගොසිප්වල දාලා තියෙන ඒවා කියවන්න තේරෙන්නේ නැහැ. මට බැනලා දාලා තියෙනවද කියලත් මම දන්නේ නැහැ.

ඒ හාදුව ලිප් කිස් එකක් කියලත් සමහරු කියන්න අරගෙන?
අනේ නැහැ. අගමැතිතුමා හිතුවේ නැහැ මම කිස් එකක් ඉල්ලයි කියලා. එයා දෙවැනි උම්මා එක ඉක්මනට දුන්නා. ඒක ෆොටෝවලට අරගෙන තිබෙන අෑන්ගල් එකෙන් පේන්නෙ ලිප් කිස් එකක් වගේනේ. එයා මගේ තාත්තා වගේ. සතුටින් මම ඒ සම්මානය ගත්තේ. හදවත සතුටින් තියෙනවා නම් ඒක පෙන්නන්න ඕන. මම ඒ වගේ. අනෙක් අයගේ සතුටින් එතකොට තවත් සතුටු වෙන්න පුළුවන්.

පූජාගේ අම්මා ලංකාවෙන් ගියාලු නේද?
මගේ සීයා නැති වුණානේ. මගේ අම්මව තාත්තා ඉන්න බැංගලෝර්වලටම එක්ක ගියා. මෙච්චර දවසක් ලංකාවේ හිටියනේ ඉතින්. එයාව සෙට්ල් කරලා ඊට පස්සේ මට නිදහස්. අම්මටයි තාත්තටයි මම උදවු කරන්න ඕනෙනේ.

අලුත් රංගන කටයුතු පටන් ගත්තද?
මම අලුත් රංගන වැඩකටයුතු ඔක්කොම ලබන අවුරුද්දේ පටන් ගන්නේ. දැන් විවාහ වෙලානේ. ඉතින් ඒ වගකීම් එක්ක අලුත් රංගන වැඩකටයුතු ලබන අවුරුද්දේ පටන් ගන්නවා.

මොනවද අනෙක් වැඩ කටයුතු?
ජාත්‍යන්තර යොවුන් දිනය, කාන්තා දිනය, ළමා දිනය වගේ බොහෝ අවස්ථා නියෝජනය කරන්න මට අවස්ථාව ලැබෙනවා. ළමා ගම්මාන එක්ක වැඩ කරලා හැමෝම එක්කම සහයෝගයෙන් වැඩ කරලා මම සතුටු වෙනවා. මම මේ දවස්වල ගාල්ල, යාපනය වගේ ලංකාවේ බොහෝ තැන්වලට ගිහින් හැමෝම එක්ක කතාබහ කරලා ඔවුන් එක්ක වැඩ කරලා ගොඩක් සතුටු වෙනවා ඒ දේවල්වලින්.

ජනතා සේවය ඉතාමත් වැදගත් – සංගක්කාරගේ දේශපාලනය තීන්දුව මෙන්න

ශ්‍රී ලංකා ක්‍රිකට් කණ්ඩායමේ හිටපු සුපිරි පිතිකරු කුමාර් සංගක්කාර සිය ෆේස්බුක් ගිණුමේ ප්‍රකාශයක් කරමින් සදහන් කර ඇත්තේ තමන් කෙඳිනකවත් දේශපාලනයට නොපැමිණෙන බවත් ඒ පිළිබඳව කිසිම කැමැත්තක් නොමැති බවත්ය.

ඊයේ (12) සිය ෆේස්බුක් ගිණුමේ සටහනක් තබමින් ඔහු මේ බව ප්‍රකාශ කර තිබේ.

වසර 2020 ජනාධිපතිවරණයට ඉදිරිපත් වන බවට පැතිරුණු කට කතා අසා තමාගේ අවධානය යොමු වූ බවත් තමා ඉදිරිපත් වන බව අසා විවිධ පුද්ගලයින් තමන්ගේ මතයන් ඉදිරිපත් කළ බවත් ඒ මතයන් සියල්ලට තමා ගරු කරන බවද ඔහු ප්‍රකාශ කර ඇත.

කෙසේ නමුත් තමාට දේශපාලනයට පැමිණීම පිළිබඳ බලාපොරොත්තුවක් කිසිම දිනෙක නොතිබූ බවත් තමා කිසිම දිනෙක දේශපාලනයට නොපැමිණෙන බවද ෙඔහු සදහන් කර තිබේ.

ජනතා සේවය ඉතාමත් වැදගත් වගකීමක් බවත් විශ්වාසයෙන් සිදුකළ යුතු වගකීම් සහිත රාජකාරියක් බවද කුමාර් සංගක්කාර පවසා ඇත.

ජනතා නියෝජිතයන්ට තමා ගරු කරන බවත් තමාට දේශපාලන බලාපොරොත්තු නොමැති බවද ඔහු ප්‍රකාශ කරයි.

දේශපාලනයට හොඳම සහ ගැලපෙනම පුද්ගලයින් තෝරා ගැනීම දුරදිග බලා සිදුකළ යුතු කටයුත්තක් බවත් ධනාත්මක සමාජ සහ ආර්ථික වෙනසක් එක රැයකින් සිදු නොවන බවද ඔහු ප්‍රකාශ කරයි.

ක්‍රිකට් ක්‍රීඩාවෙන් සමුගත් පසු තමාගේ පළමු අරමුණ වූයේ තමාගේ පවුල සඳහා අවධානය යොමු කිරීම බවද ඔහු ප්‍රකාශ කරයි.

ඉදිරියට පරිත්‍යාගශීලීන් සමඟ එකතු වී සමාජ සේවා කටයුතු ඉදිරියට ගෙනයාම තම බලාපොරොත්තුව බවත් දේශපාලඥයන්ගේ යහපත් වැඩ සඳහා තමාගේ සම්පූර්ණ සහයෝගය ලබාදෙන බවද ඒ මහතා වැඩිදුරටත් ප්‍රකාශ කර තිබේ.

අහිංසක වන සතුන්ට වින කරපු පව්කාරයෝ අල්ල ගත්ත හැටි

හබරණ, මින්නේරිය, පොළොන්නරුව ආදී ප්‍රදේශවල දෙස් විදෙස් සංචාරකයන් නවාතැන් ගන්නා නවාතැන්පොළවල් මෙන්ම නිවාඩු නිකේතනද බහුලය. මෙහි පැමිණෙන සංචාරකයන්ගෙන් දඩමස්වලට හොඳ ඉල්ලුමක් ඇති බව ප්‍රසිද්ධ රහසකි.

දැන් ඒ මසට ලොල් වූ පිරිසගේ ජීවිතය අහිමි වෙන තැනට කටයුතු යොදමින් තිබේ.මෙම තොරතුරු අනාවරණය වූයේ පොළොන්නරුවේ සෝමාවතිය ජාතික වනෝද්‍යානය තුළ සතුන්ට වසදී මරා මස් තොග වශයෙන් සංචාරක නිකේතනවලට අලෙවි කිරීමේ මහා පරිමාණ ජාවාරමක් වනජීවී නිලධාරීන් විසින් වටලනු ලැබීමෙන් අනතුරුවය.

දඩමස් ජාවාරම හබරණ, මින්නේරිය වැනි ප්‍රදේශවලට අලුත් දෙයක් නොවේ. බඳින තුවක්කු හෝ පතරොම් තුවක්කු මඟින් සතුන් දඩයම් කිරීම සිදුවේ. නමුත් වන සතුන් පවස නිවා ගන්නා දිය කඩිතිවලට උග්‍ර වස මිශ්‍ර කර සතුන් සිය ගණනක් එක රොත්තට මරා දැමීමේ සිරිතක් ගැන අසා නොතිබිණි.

පොළොන්නරුව ප්‍රදේශය මේ දිනවල දැඩි නියඟයකට ගොදුරු වී තිබේ. මාස තුනකට අධික කාලයක් වර්ෂාව නොලැබීම නිසා වනයේ තැන් තැන්වල ඇති දිය කඩිති බොහොමයක් සිඳී ගොසිනි. දිය කඩිති පමණක් නොව ඇතැම් වැව්ද වියළී ගොසිනි. ජලය ස්වල්පයක් හෝ ඉතිරිව ඇත්තේ වැව් මධ්‍යයෙහි පිහිටි වළවල්වල පමණය. තණ පිටිද වියළී දැඩි ආහාර හිඟයකට මුහුණ දී සිටින ගෝනුන්, මුවන්, හාවුන්, මීමින්නන්, ඕලු මුවන් ආදී සතුන් පවසට දිය බිඳක් සොයමින් තැන තැන ඇවිදින්නේ කෙසේ හෝ පන නළ රැකගැනීමේ අටියෙනි. සාගින්නට වඩා පිපාසය දරුණුය.

වෙඩි තබා සතුන් මරා අලෙවි කළ ජාවාරම්කරුවන් කල්පනා කොට ඇත්තේ දිය කඩිතිවලට වස මුසු කිරීමෙන් ඉතා පහසුවෙන් සතුන් විශාල සංඛ්‍යාවක් එකවර මරා ගැනීමට ඇති හැකියාව ගැන පමණි.පොළොන්නරුව කලාපය භාර වනජීවී අඩවි නිලධාරියා වූ උපාලි කුමාරතුංග මහතාට එක්තරා පුද්ගලයකුගෙන් ඔත්තුවක් ලැබිණි. ඒ සෝමාවතිය වනෝද්‍යානය තුළ පිහිටි සත්පත්තිනි නමින් හැඳින්වෙන වැව අවට තැන් තැන්වල මියගිය සතුන්ගේ සිරුරු විශාල සංඛ්‍යාවක් දක්නට ඇති බවයි.

නිලධාරීන්ගේ හිඟය ඉදිරියට දමා වැටලීම්වලට කල්මරන නිලධාරියකු නොවූ උපාලි කුමාරතුංග මහතා මේ පිළිබඳ සොයා බලා අපරාධකරුවන් අත්අඩංගුවට ගැනීමේ මෙහෙයුමක් සැලසුම් කළේය. මැදිරිගිරිය සහ සුංගාවිල බීට්ටු කාර්යාලවල නිලධාරීන්වද පොළොන්නරුව අඩවි කාර්යාලයට කැඳවූ කුමාරතුංග මහතා මුලින්ම සිදු කළේ සෝමාවතියේ සත්පත්තිනි වැව අවට ප්‍රදේශයෙහි සෝදිසි මෙහෙයුමක් දියත් කිරීමයි.

වැවට කිලෝමීටරයක් පමණ ආසන්න වෙද්දීම ප්‍රදේශය පුරා ඉවසිය නොහැකි දැඩි දුර්ගන්ධයක් පැතිරී යමින් තිබූ බව මෙහෙයුමට සම්බන්ධ වූ නිලධාරීහු සඳහන් කරති. තවත් ඉදිරියට යද්දී ඔවුනට දැකගත හැකිවූයේ මහ පොළොව නුහුලන අපරාධයකි. දුටු දුටු තැන ගෝනුන්, මුවන්, හාවුන්, මීමින්නන්, ඉත්තෑවුන් ආදී සතුන්ගේ බාගෙට කුණු වී ගිය මළ සිරුරුය. එහි කුඩාම පැටවුන්ගේ සිරුරු පවා තිබිණි.

ගස්වල එල්ලා සතුන් මස් කර තිබූ තැන්වල උන්ගේ අං, පාදවල කොටස්, සම් සහ ඇටකටු ගොඩවල්ය. අත්අඩංගුවට ගත් සැකකරුවන්ගෙන් අනාවරණය වූ පරිදි ඔවුන් වස ශරීරගත වීම නිසා ඒ වනතුරුත් නොමැරී පණ අදිමින් සතුන්ම පවා අමු අමුවේම හම ගසා මස් කොට තිබේ.

සිඳී ගිය සත්පත්තිනි වැව මැද පිහිටි වතුර වළවල් කිහිපයකට වස දැමීම නිසා ඉන් දිය පානය කළ පැටවුන්ද ඇතුළු ලොකු කුඩා සියලුම සතුන් මෙන්ම මසුන්ද මියගොස් ඇත. වැවේ සිටි දැවැන්ත හැල කිඹුලකුවද අල්ලා මරා මස් කිරීමෙන් අනතුරුව සිරුරේ සුන්බුන් කොටස් පුලුස්සා තිබියදී හමුවූ බව නිලධාරීහු පවසති. මැරුණු සියලු සතුන් මස් කර රැගෙන යෑමට නොහැකි බැවින් කොටසක් ගෙන ගොස් තවත් කොටසකගේ සිරුරු හැර දමා ගොස් තිබූ අතර දුගඳ හමමින් තිබුණේ ඉතිරි කර දමා ගොස් තිබූ මළ සිරුරුවලිනි.ඊළඟට සිදුවූයේ ලැබෙමින් තිබූ තොරතුරුවලට අනුව යමින් අපරාධකරුවන් නීතියේ රැහැනට කොටුකර ගැනීමේ මෙහෙයුම ආරම්භ කිරීමයි.

වනජීවී නිලධාරි කණ්ඩායම් තුනක් දින දෙකක් පුරා සිදු කළ මෙහෙයුමේ ප්‍රතිඵලය වූයේ ජලයට වස මිශ්‍ර කර සතුන් මරන ලද අයගෙන් කෙනකු පොළොන්නරුවෙන්ද, තවත් තිදෙනකු මැදිරිගිරිය ප්‍රදේශයෙන්ද අත්අඩංගුවට ගැනීමට හැකි වීමයි. සැකකරුවන් සිවුදෙනාම හිඟුරක්ගොඩ මහෙස්ත්‍රාත් අධිකරණයට ඉදිරිපත් කිරීමෙන් පසුව ඇප ලබා දී තිබේ.

සතුන් මරා දමා ඇත්තේ සෝමාවතිය ජාතික වනෝද්‍යානය තුළයි. ජාතික වනෝද්‍යානයකට අනවසරයෙන් ඇතුළුවීම පවා දඬුවම් ලැබෙන වරදකි. එමෙන්ම ජාතික වනෝද්‍යානයක් යනු වනජීවීන්ගේ සංරක්ෂණය වෙනුවෙන් සතුන්ටම වෙන් කරන ලද භූමි ප්‍රදේශයකි. සතුන්ගේ භූමියකට ඇතුළු වී ඇති අපරාධකරුවන් සිදුකර ඇත්තේ සත්ත්ව ඝාතනයක් නොව මහා සත්ත්ව සංහාරයකි. එමෙන්ම ඔවුන් කර ඇත්තේ මස් ආහාරයට ගන්නා මනු සතුන්වද පරලොව යැවීමේ ක්‍රියාවකි. සාමාන්‍ය වශයෙන් විස ශරීරගත වූ සතකුගේ මස් කෑමට ගැනීමෙන් පවා වකුගඩු අකර්මණ්‍ය සහ පිළිකා වැනි රෝග තත්ත්වයන්ට ගොදුරු විය හැකි බව වෛද්‍ය මතයයි. හබරණ, මින්නේරිය, පොළොන්නරුව ආදී ප්‍රදේශවල නිවාඩුව ගත කිරීමටත්, සතුන් බැලීමටත් යන ඔබ මස් ආහාරයට ගැනීම පිළිබඳ දෙවරක් සිතා බැලීමේ කාලය එළැඹ තිබේ.

 

රටම රවට්ටලා ,පොලීසියත් අන්දවලා කරපු ඒ ලෙවල් බොරුව

ජීවිතය ජය ගැනීමට ඇති එකම මඟ අධ්‍යාපනයයි. එය සකස් කරමින් දැයේ දුවා දරුවෝ තම ළමා විය පසෙක දමා හෙට දින ජය ගන්නට වෙර දරති. ඒ, නූතන සමාජය ජය ගැනීමට නම් අධ්‍යාපනය පසෙක දමා පියවරක් හෝ ඉදිරියට යෑමට නොහැකි බව හොඳින් දන්නා බැවිනි. මෙවන් පසුබිමක් තුළ පාසල් විෂයට සීමා වූ දරුවන්ට විෂය පරිබාහිරින් යමක් සිතන්නට තරම් හැකියාවක් නැති තරම්ය. ජීවිතය ජය ගැනීම මෙන්ම තම මවුපියන්ගේ අපේක්‍ෂාවන් ඉටු කර දීමට දරුවන් දරන උත්සාහය කොතරම්ද යන්න වර්තමානයේ අසන්නට දකින්නට කොතරම් උදාහරණ තිබේද? පසුගියදා තම පියාගේ දේහයට අවසන් ගෞරව දක්වමින් ඒ පියාගේ පැතුම ඉටු කරන්නට ශිෂ්‍යත්ව විභාගයට ගිය දිරිය දියණියකගේ කතාව ඉතා සංවේදීව සිවුදෙස පැතිරෙන්නට වුණේ මිනිස් හදවත් කම්පා කරමින්ය.

එවන් පුවතක් සිවුදෙස පැතිරෙන්නටත් මත්තෙන් මිනිස් සිත් කම්පාවට පත් කරමින් තවත් එවැනිම සිදුවීමක් වාර්තා වුණේ මාතර නගරයෙන්ය. ඒ මෙවර උසස් පෙළ විභාගයට පෙනී සිටි සිසුවකු කිසිවකු හෝ විසින් පැහැර ගත්තේ යැයි පුවතක් සැලවීමත් සමඟය.

වසර ‍ෙදාළහක් තම ළමා විය කැප කර එහි අස්වනු නෙළා ගන්නට පෙර මේ අපරාධය කළේ කවුරුන්ද යන්නත්, එම අපරාධ කළ වුන්ට දෙස් දෙවොල් තියන්නටත් පුවත දැනගත් අය පටන් ගත්හ. විභාගයට ලියන්නට ඉඩ නොදී එලෙස පාසල් ශිෂ්‍යයකු පැහැරගෙන ගොස් පසුව අතරමඟ දමා යෑමට තරම් කිසිවකුට ඇති ඕනෑකම කුමක්දැයි කුතුහලයක්ද දැනවීය. එහෙත් මේ පිළිබඳව මෙම සිසුවාගේ ප්‍රකාශවලට අනුව පෙනුණේ ඔහුව කවුරුන් හෝ පැහැරගෙන ගොස් ඇත්තේ ඔහුගේ දක්‍ෂතාව ඉවසන්නට බැරිව බවටය. එහෙත් පැරැණි කියමනකට අනුව තම සියලු දේපළ සොරා ගත්තද උගත් දෑ සොරා ගැනීමට හෝ එයට අභියෝග කිරීමට කිසිවකුටත් බැරි යැයි කියන කියමන මෙම ශිෂ්‍යයා අසා නොතිබෙන්නට ඇත.

දිනය මේ මස 06 වැනිදාය. මාතර මූලස්ථාන පොලිස් ස්ථානාධිපති ප්‍රධාන පොලිස් පරීක්‍ෂක ධම්මික අමරසේන මහතා හමුවට පැමිණ කළ පැමිණිල්ල වූයේ එදින උදෑසන මාතර සරම්මුදලි මාවතේ තම නිවෙසින් පිටව මාතර ශාන්ත තෝමස් කුමර විදුහලේ විභාග මධ්‍යස්ථානය වෙත ගිය තම දරුවා කිසිවකු විසින් පැහැරගෙන පාළු ස්ථානයක දමා ගොස් ඇති බවයි. එම පුවත සැලවීමත් සමඟ පොලිස් ස්ථානාධිපතිවරයාගේ දෑස රතුවන්නට විය. මෙම අපරාධය කළේ කවුද? දරුවන් සිටින තාත්තා කෙනකුට වගේම අධ්‍යාපනයේ වටිනාකම හොඳින් දත් මේ නිලධාරියාට ඉවසුම් නැති විය. මෙය සාහසික අපරාධයකි. ඔහු වහා අපරාධ විමර්ශන අංශයේ ස්ථානාධිපතිවරයා වන ප්‍රධාන පොලිස් පරීක්ෂක කමල් කිරිඇල්ල මහතා කැඳවීය. මේ අපරාධකරුවන් සෙවීමට පෙර වහා සිසුවාගෙන් ප්‍රකාශ සටහන් කර ගැනීමට නියෝග කළේය. ඒ අනුව මෙම සිදුවීම එකින් එක පෙළගස්වා ගත් පසු එය මෙසේ පොලිස් නිලධාරීන් ඉදිරියේ ප්‍රකාශ කෙරුණේය.

සිසුවා පවසන ආකාරයට තමන් මාතර ශාන්ත තෝමස් කුමර විදුහලේ විභාග මධ්‍යස්ථානයට යෑමට ඉසදීන් නගරය ඔස්සේ සරම්මුදලි මාවත දිගේ එන අවස්ථාවේදී කිසිවකු පිටුපසින් පැමිණ තමාගේ දෑස බැඳ ත්‍රිරෝද රථයක දමාගෙන ගිය බවයි. පසුව මඟදී වෙනත් රථයකට තමා මාරු කළ බව තමාට තේරුණු බවත් බොහෝ දුරක් එම රථය ගමන් කර තමාව මාර්ගය අයිනකට තල්ලු කර දමා ගිය බවත්ය. අනතුරුව තමා දෑස විවර කර බැලීමේදී ඔහු සිටිනා තැන කොහිදැයි කොතැනදෝයි සොයාගත නොවූ හෙයින් ඒ අසලින් ගිය වැඩිහිටියකුගෙන් විමසූ බවත් එවිට ඔහු මෙම ස්ථානය අහංගම ගොවියාපාන ප්‍රදේශය බවත් පැවැසූ බව කියැවේ. ඉන් අනතුරුව තම නිවෙසට මේ බව දුරකථනයෙන් දැනුම් දුන් පසු පවුලේ උදවිය මෙලෙස පොලිසියට කැඳවාගෙන ආ බවද කියා ඇත.

තමා ගිය වසරේ අ.පො.ස. උසස් පෙළ විභාගයට පෙනී සිටීමට නියමිතව තිබුණද එදිනද හදිසියේ රෝගාතුර වූ නිසා තමාට එම වර්ෂයේදී විභාගයට පෙනී සිටීමට නොහැකි වූ බවද ඔහු තවදුරටත් කියා සිටියේය. මෙවර තමා දිවයිනේ පළමු වැනියා වීම අනිවාර්ය බවත් එය වැළැක්වීමට කිසිවකු මෙලෙස තමා පැහැරගත් බවත් පැවැසූ ඔහු පොලිසිය තමාගෙන් ප්‍රශ්න කරන්නේ මන්දැයි පොලිසියට ගෝරනාඩු කරන්නටද වූයේය. ඔහු ඉතා උස් හ¾ඩින් පොලිසියට චෝදනාත්මක ස්වරූපයෙන් කතා කළේය. දිවයිනේ පළමු වැනියා බවට තමන් පත්වීම අනිවාර්ය බවත් එය වැළැක්වූ අයට වහා නීතිය ක්‍රියාත්මක කරන ලෙසත් එය පසුබට කරන්නේ මන්දැයි ඔහු තවදුරටත් පොලිසියට චෝදනා කළේය.

එහෙත් මේ ප්‍රකාශ ඉතා විමසිලිමත්ව පසෙක පුටුවකට වී හොඳින් අසා සිටි මාතර මූලස්ථාන පොලිසියේ අපරාධ අංශයේ පොලිස් පරීක්‍ෂක එන්.එස්. විජේරාම මහතාට අදහසක් පහළ විය. ඔහු සිසුවාගේ ප්‍රකාශවල ඇති පරස්පර විරෝධී වචන හා ඔහුගේ හැසිරීම නිරීක්‍ෂණය කළේය. රුපියල් විසි පන්දහසකට එහා ගිය ජංගම දුරකථනය පවා ඔහු පැහැර ගත්තාය කියන පුද්ගලයන් නොගත්තේ මන්ද, වාහනයෙන් බිමට දමාගිය සිසුවාගේ පාසල් නිල ඇඳුම් නිවෙසින් හොඳින් මැද ඇඳ පැලැඳගෙන ආ ආකාරයටම තිබෙන්නේ කෙසේද?, මෙම සිසුවා සුළු හෝ ලෙසින් පොර බැදුවේ නැද්ද? බියෙන් ඇලළී ගිය දෑසක් ඔහුට නැත්තේ ඇයි? ඒ සියල්ලටම වඩා මෙලෙස පාසල් සිසුවකු පැහැර ගැනීමට කිසිවකුට හෝ ඇති පලය කුමක්ද? යන ප්‍රශ්නාර්ථ රාශියක් විජේරාම මහතා සන්සුන්ව තවදුරටත් විමසුමට ලක් කර ගත්තේය. සිසුවාගෙන් ප්‍රශ්න කරන්නට පටන් ගත්තේ අනතුරුවය. එහිදී අනාවරණය වූයේ තමා අති දක්ෂයකු බවත්, තමා දැනටද උපකාරක පන්ති කරන බවත්, තමාගේ වයසේම සිසුන් තිහ හතළිහක් තමාගෙන් අධ්‍යාපනය ලබන බවත්ය.

මේ ප්‍රකාශ මෙම විමර්ශනයට ඉතා වැදගත් ඒවා විය. අනතුරුව විජේරාම මහතා මෙම සිසුවා වෛද්‍ය පරීක්‍ෂණයකට යොමු කරන ලෙස මාතර මහ රෝහලට යොමු කළේය. ඒ අනුව සිසුවා මාතර රෝහල කරා තම ඥාතීන්ද සමඟ පිටත් කර යැවිණි. ප්‍රකාශවලින් තමන් තේරුම්ගත් කරුණු නිවැරැදිද යන්න සොයා බැලීමට පොලිස් පරීක්‍ෂක විජේරාම මහතා අපරාධ අංශයේ ස්ථානාධිපති කමල් කිරිඇල්ල මහතා සමඟ අපරාධයක සුලමුල සොයන්නට උකුසු ඇස් ඇති දක්‍ෂයකු ලෙස නම් දැරූ උප පොලිස් පරීක්‍ෂක නිරෝෂන් සහ ඊට සහායට එක්වූ පොලිස් සැරයන් ජයලත් (56209) යන කණ්ඩායම සූදානම් විය.

වහා ජීප් රථයක් ගෙන්වා ගත් මොවුන් සිවුදෙනා ඉගිළෙන්නට වූයේ සිසුවා පැහැරගත් ස්ථානයටය. එම ස්ථානය නිරීක්‍ෂණය කළ පොලිස් නිලධාරීන්ට ඒ අසල නිවෙසක සවිකර තිබූ ආරක්‍ෂිත කැමරා පද්ධතියක් දැක ගන්නට වී තිබේ. මෙය මෙම සිදුවීම සම්බන්ධව හොඳ සාක්‍ෂි ලබාගත හැකි මඟ යැයි සිතූ මොවුන් එම නිවෙසේ සවිකර තිබූ ආරක්‍ෂක කැමරා පද්ධතියේ සටහන් වූ දර්ශන එකින් එක නරඹන්නට විය. එහිදී උදෑසන 7.36ට පමණ මෙම සිසුවා ඒ අසලින් ඉතා හොඳින් ගමන් කරනවා සටහන් වී තිබිණි. ඔහු එම කැමරාව අසලින් පාර මාරු වී ඉතා හොඳින් ගමන් කරන ආකාරයත් එහි සටහන් වී තිබිණි. මේ ආකාරයට මාර්ගය අසල ඇති කැමරා නිරීක්‍ෂණය කළ නිලධාරීන්ට මෙම සිසුවා පැහැර ගත්තේ යැයි කියන සිද්ධිය මුසාවක් බව තහවුරු කරගත හැකි විය. ඒ අනුව ඔහු මෙලෙස පොලිසිය නොමඟ යැව්වේ ඇයිද යන ප්‍රශ්නය පමණක් මතු වෙද්දී මේ කියූ සියලු චෝදනා බොරු වන බැවින් එසේ පොලිසිය නොමඟ යැවීමට හේතු වන කාරණා සොයා ගැනීමට අවශ්‍ය විය.

තමා කිසිවකු පැහැර ගත්තේ යැයි කියන සිද්ධිය එතරම් සුළු පටු එකක් නොවන බවත් විශේෂයෙන්ම උසස් පෙළ විභාගයට පෙනී සිටි සිසුවකු මෙලෙස පැහැර ගැනීම බරපතළ සිදුවීමක් නිසා සත්‍යම දැන ගන්නට පොලිසියේ ඉහළම නිලයන්ගෙන් මාතර පොලිසියට නියෝග ලැබිණි.

එහිදී පොලිස් නිලධාරීන් ඉදිරියේ සිසුවා එකින් එක තමා කළ බොරුව හෙළි කරන්නට වූයේය. ඒ අනුව ඔහු අ.පො.ස. උසස් පෙළ විභාගයට පෙනී සිටීමට නිවෙසින් බැහැර වී ඇත. සරම්මුදලි මාවත ඔස්සේ ගමන් කරන විට ඔහුට මෙසේ සිතුණු බව පොලිසියට කියා ඇත.

“මම කාලෙක ඉඳලා උසස් පෙළ සිසුන්ට උපකාරක පන්ති කරනවා. මම හිතනවා මගෙන් ඉගෙන ගත් ළමයින්ට අනිවාර්යයෙන්ම ‘ඒ’ සාමාර්ථයක් ලැබෙයි කියලා. ඒ වුණත් ඒ ළමයින් සමඟ විභාගයට යන මට ‘ඒ’ සාමාර්ථයක් ගන්න බැහැ කියලා හිතට දැනුණා. ඒ බයට මම කල්පනා කර කර ආවා. මම තීරණය කළා විභාගයට පෙනී නොසිටින්නට. මම පාරදිගේ ඇවිදගෙන මාතර නූපේ මංසන්ධියට ආවා. ඒ අසල බස් නැවතුම්පළේ නතර වෙලා සිටිද්දී මාතර සිට ගාල්ල දෙසට බස් රථයක් ආවා. මම එකේ නැග්ගා. ටික දුරක් ගිහින් මම මඟ බැස්සා. ඒ කොතැනද දන්නේ නෑ. මම අසලින් ගිය අංකල් කෙනකුගෙන් ඇහුවා. ඔහු මට කිව්වා මේ අහංගම ගොවියාපාන කියලා. මම ටික වෙලාවක් ඉඳලා විභාගය ඉවර වුණාම ගෙදරට කෝල් කරලා කිව්වා මම පැහැරගෙන ගොවියාපානේ දමා ගිය බව. ඊට පස්සේ තමයි ගෙදරින් ඇවිත් මාව මේ විදියට පොලිසියට රැගෙන ආවේ.”

පසුව ඔහුගේ පියා විදේශගතව සිටින බැවින් මේ පිළිබඳව මවට පවසා තිබේ. මේ ප්‍රකාශ එකින් එක පෙළ ගස්සා කියන විට සිසුවාගේ ඥාතීන් ලැජ්ජාවෙන් ඇඹරෙන්නට විය. එහෙත් සිසුවා මේ වන විටත් අමාරුවේ වැටී අවසානය. රාජ්‍ය නිලධාරීන් නොමඟ යැවීම, අසත්‍ය ප්‍රකාශ කිරීම වැනි බරපතළ චෝදනා රාශියකට වැරැදිකරුවකු වනවාට එහා ගිය වරදක් සිදු කර ඇත. ඒ එදා උසස් පෙළ ලිවීමට සැරසුණු අනෙකුත් සිසුන්ගේ මානසික තත්ත්වයට දැඩි බලපෑමක් සිදුවිය. ඔවුන් බියට පත් විය. දක්‍ෂ දරුවන් මූණු වහලා රැගෙන යාවිදෝ බිය ඔවුන්ට දැනෙන්නට විය. ඒ හැරුණු විට මෙම සිසුවාගෙන් ඉගෙන ගත්තේ යැයි කියන සිසුන්ගේ මානසික තත්ත්වයට කෙබඳු බලපෑමක් එල්ල වන්නට ඇත්ද? තමන් ඉගැන්වූ ගුරුතුමා පැහැර ගත්තේ යැයි දැඩි මානසික පීඩනයකින් එම සිසුන් විභාගයට මුහුණ දෙන්නට ඇත. මේ කරුණු සැලකීමේදී මෙම සිසුවා මෙවැනි තත්ත්වයකට පත් වුණේ ඇයිද යන්න විමසිය යුත්තකි. සිසුවකු වුව ඔහු කර ඇති දේ බරපතළය. එබැවින් දුරදිග නොසිතා මෙවැනි දේ කරන්නට පෙලැඹෙන සිසුන්ට නීතියෙන් ගැලවීමක් නැති වන බවට මෙය උදාහරණයක් වනු ඇත.

ගංගාරාමේ ලග බෝඩ් අල්ලගෙන හිටපු චීනගේ ලැප හම්බවෙලා

කොළඹ ගංගාරාමය ළඟ පහුගිය දවසක චීන ජාතිකයෙක් බෝඩ් එකක් අල්ලගෙන හිටියා. ඒ ඔහුගේ ලැප්එක ත්‍රීවිල් රථයකදි අමතක වුණා කියලා. ඔහු වැඩ කරන ඔෆිස් එකේ වැදගත් ලිපිගොනු ගොඩක් මේ ලැප් එකේ තිබුණා. ඒ නිසාම රැකියාව පවා නැතිවෙන තත්වයක තමයි ඔහු හිටියේ.

මේ ගැන දැකපු අපේ කොල්ලෝ ටිකක් ඔහුගේ පෝස්ටර් එක්කම සිද්ධිය ගැන කියලා ෆේස්බුක් එකට ඡායාරූප කිහිපයක් එකතු කරලා තිබුණා. මේ ඡායාරූප හැමතැනම හුවමාරු වෙද්දි ත්‍රීවිල් රියදුරාත් ඒක දැකලා මේ විදේශිකයාට දුරකථනයෙන් කතා කරලා තිබුණා.

පස්සේ දෙන්නම හම්බවෙලා අන්තිමේදි විදේශිකයාට ලැප්එක භාරදුන්නා. ඒ සතුටට විදේශිකයා අපේ ත්‍රීවිල් රියදුරාට රුපියල් 30,000ක මුදලක් තෑගි කළා. ඒ වගේම ඔහුට ලැප් එක හොයාගන්න උදව් කරපු ලංකාවේ හැමෝමට ඔහු ස්තූති වන්ත වුණා.

ජායාරූප පහතින් නරඹන්න